Myndband - Prjónað leirhjarta :)

Beinn linkur á myndbandið: https://www.youtube.com/watch?v=iGC_nljHlF4

Halló! Ég er búin að vera að leira heil ósköp úr Fimo-leir og hef nánast ekkert sinnt Snedderí, en ákvað að deila frábærri aðferð sem ég lærði um daginn - að láta leirinn líta út eins og hann sé prjónaður :D

Myndi segja að þetta myndi gera fallegt jólaskraut handa prjónurum, eða jafnvel hálsmen :)

Hérna eru nokkur sem ég gerði þegar ég var að æfa mig, pottaleppur, lítið hjarta og tveir vettlingar :D

 Hér er svo það sem þarf áður en byrjað er. Augnskugginn/púðrið er ekki nauðsinlegt, en það setur mjög skemmtilegann blæ á leirinn :)

Hérna er svo myndbandið, njótið vel og hafið samband á www.facebook.com/snedderi eða jodiseva@gmail.com ef eitthvað er :)

Kv. Jódís Eva

Sjö-banda fléttan hennar Rebekku (myndband)

Hellú :)
Dóttir mín kom heim með einstaklega fallega fléttu sem hún hafði búið til í Textíl-tíma með lítinn pappahring að vopni:

Þetta þurfti ég að læra! Þannig að eggið fór að kenna hænunni og nú ætlum við að kenna ykkur :)

Það fyrsta sem þarf er þunnur pappi; kassi utan af morgunkorni hentar fullkomlega.
Klippið út lítinn hring, ca. 8-10 cm að þvermáli (það skiptir ekki öllu.) og stingið lítið gat í hann miðjann.

Síðan þarf að klippa 8 rifur jafnt yfir hringinn, ca. hálfa leið inn að miðjunni.

Svo þarf að klippa 7 jafnlanga spotta, annað hvort í mismunandi litum, eða alla eins, eða bara hvað sem er. Til að byrja með, sérstaklega ef það eru börn sem eru að prufa þetta, er gott að hafa böndin ekki of löng svo þau flækist ekki.
Við ákváðum að safna saman öllum þráðum nr. 10 sem voru til í safninu mínu og fundum sem betur fer 7 mismunandi liti - mig langaði rosalega að sjá hvert hver spotti myndi fara!

Svo þarf að þræða alla spottana í gegnum gatið. Það er hægt að gera það með stoppunál ef böndin eru lítil. Næst þegar ég prufaði að gera svona, notaði ég Mandarin petit sem er aðeins grófara og þá kom ég böndunum í gegn með heklunál. Aðalatiðið er bara að koma þeim í gegn :)

Síðan er bundinn hnútur svo böndin renni ekki í gegn:

Síðan er spjaldinu snúið við og öllum böndunum er smeygt ofaní sitthvort gatið:

Þegar allt er uppsett, er komin tími til að horfa á vídjóið :) Ef einhverjar spurningar vakna, hafið samband í kommentum eða á www.facebook.com/snedderi :)

Kennslumyndband í orkeringu: Snjókorn

Hæhæ :) Hérna er komið annað myndband í orkeringu, hugsað fyrir fólk sem hefur lært grunninn (http://snedderi.blogspot.com/2015/03/grunnkennsla-i-orkeringu-myndbond.html) en er kannski ekkert sérstaklega vant :)

Það sem til þarf er orkeringarnál nr. 5 eða 7 (ég nota 7) og garn nr. 10 eins og t.d. Mandarin Heklegarn.

Njótið vel og hafið samband ef spurningar vakna :)

Fylgist með á www.facebook.com/snedderi :)

Grunnkennsla í Orkeringu (myndbönd)

Sælt veri fólkið!

Hér á eftir fara þrjú myndbönd sem ég bjó til sem fara yfir grunn-atriðin í orkeringu með nál. Í því fyrsta er kennt að gera tvöfaldann hnút (e: double stitch) , í númer tvö er kennt að gera hring (e: ring), keðju (e: chain) og lauflykkju (e: picot), og í því þriðja er kennt að gera armband með aðferðunum sem kenndar eru í fyrstu tveim myndböndunum.

Myndböndin eru gerð með algjöra byrjendur í huga.

Það sem þarf til að byrja með er þar-til-gerð orkeringarnál nr. 5 eða 7 (ég nota nr. 7 því þá verður verkið þéttara og jafnara finnst mér), sem fæst í verslunum A4. Pakkningarnar líta svona út:

Svo þarf garn nr. 10, eins og t.d. Mandarin Heklegarn:

Njótið vel og ekki hika við að spurja ef eitthvað er, hægt er að hafa samband hérna í commentum eða þá á facebook.com/snedderi :)

Myndband nr 1: Tvöfaldur Hnútur

Myndband nr. 2: Hringur, keðja og lauflykkja.

Myndband nr. 3: Armbandið klárað!

Njótið vel og endilega deilið og dreifið myndböndunum að vild :) Fleiri munu líklega fylgja þannig að endilega fylgist með á www.facebook.com/snedderi :)

Uppskrift: Flottasta heklaða blómið!

Úr myndvinnslu yfir í hekl, um að gera að hafa þetta soldið fjölbreytt!

Ég hef eytt miklum tíma á Pinterest undanfarið, þá sérstaklega við að leita að uppskriftum að hekluðum blómum. Og ég komst að því að eina blómið sem ég kann að gera utanað, er flottara en allt sem ég hef hingað til fundið, og ætla ég því að deila aðferðinni lauslega með ykkur.

Upprunalega var afbrigði af þessu blómi í einhverri bók sem ég keypti í Kanada fyrir ca. 12 árum. Bókin sú var með allskonar ömmukössum (e. granny squares) en það er laaaangt síðan ég týndi henni, en hinsvegar á ég mynd frá 2006 af tösku sem ég gerði eftir þeirri uppskrift:

Mér fannst hún agalega flott.... en því miður gekk ég svo illa frá endunum að hún raknaði öll upp ansi fljótt :P Lærði ágætis lexíu :P

En allavega, blómið sem ég ætla að gera núna er örlítið öðruvísi, ég er búin að gera það ansi oft í gegnum tíðina og ég hugsa að það sé aldrei nákvæmlega eins... en þessir uppliftu petalar eru gegnumgangandi í öllum útgáfum, enda afskaplega fallegir, finnst mér :) Nálin sem ég notaði er 3.5mm og garnið bara venjulegt akrýl garn, litirnir eru ekkert sérstaklega vel samsettir, þetta voru bara þeir hniklar sem voru næst mér ;)

Ef uppskriftin er kjánalega orðuð er það af því ég kann ekkert á uppskriftir og enn síður á íslenskar uppskriftir, lærði að hekla á ensku :P En þess vegna eru myndir...

Let's do it!

Svona mun þetta líta út :)

** í lok allra umferða þarf að sameina hringinn með keðjulykkju (e. slip stich).

1. Gerið 4 loftlykkjur og sameinið í hring. Gerið 2 loftlykkjur (margir gera bara eina loftlykkju þegar fastapinnaumferð er hafin, en mér finnst betra að hafa þær tvær) og heklið 7 fastapinna og sameinið loftlykkjunum í byrjun umferðar (8 fastapinna í umferð). Í næstu umferð fara svo 2 fastapinnar í hvert gat. (16 fastapinnar í umferð)

2. Gerið 4 loftlykkjur. Hoppið yfir næsta gat og setjið einn fastapinna í það þarnæsta. Gerið þrjár loftlykkur og setjið fastapinna í þarnæsta gat. Endurtakið út umferð.  Nú eru 8 stór göt :)

3. Þá þarf að smegja sér inní fyrsta gatið með keðjulykkju. Gerið 2 loftlykkjur (eða eina) og inní gatið fer (fastapinni, hálfur stuðull, stuðull, hálfur stuðull, fastapinni). Endurtakið 7 sinnum í viðbót :) Sameinið og slítið frá.

Jafnvel þó blómið sé haft í einum lit, er eiginlega nauðsinlegt að slíta frá á þessum tímapunkti. Ég hef reynt að komast hjá því en það hefur aldrei komið vel út af því ég þarf að byrja næstu umferð að aftan.

4. Ég er alls ekki viss hvernig á að lýsa þessu næsta skrefi í hekl-orðum hehe, en hér þarf að hekla í kringum hvern pinna. Nálinni er stungið í gegn að aftan, framyfir fastapinnann og svo aftur bakvið blómið (eins og örin sýnir), þar er bandið sótt og dregið sömu leið til baka. Síðan er bandinu slegið uppá aftur og dregið í gegnum báðar lykkjurnar á nálinni. Síðan eru gerðar 4 loftlykkjur og það sama er gert utan um næsta pinna. Endurtakið út umferð.

Það er líka flott að hafa umferð númer 4 áfram í gula litnum, en mér finnst persónulega flott þegar nýji liturinn sést svona á milli gulu petalanna :)

Svona er blómið að aftan eftir skref 4.

5. Þá er það petalaröð númer tvö. Líkt og með þá gulu, þarf að smegja sér inní fyrsta gatið með keðjulykkju. Tvær loftlykkjur og inní gatið fer (fastapinni, hálfur stuðull, stuðull, 2x tvöfaldur stuðull, stuðull, hálfur stuðull, fastapinni. Allt innan svigans fer svo inní öll hin 7 götin.

6. Þetta skref er í stórum dráttum alveg eins og skref nr. 4 nema í þetta sinn eru gerðar 5 loftlykkjur í staðinn fyrir 4.

7. Þá er það síðasta skrefið. Það er eins og skref 5, en inní gatið fer (fastapinni, hálfur stuðull, 2x stuðull, 3x tvöfaldur stuðull, 2x stuðull, hálfur stuðull, fastapinni). 

Það er hægt að gera svo margt við þetta blóm, setja það á hárbönd og húfur, spennur, kjóla, töskur, teppi, hvað sem er :)

Hér er Rebekka mín með blómahúfu (þetta er gert úr tvöföldum plötulopa)

Hérna skellti ég einu í hárið á henni þegar hún var að fara á prinsessuball... Planið var að hafa þrjár petalaumferðir á því eins og hinu, þá hefði það komið mun betur út... en alas, ég rann út á tíma, ballið var að byrja og mamman ekki búin þannig að þessu var bara skellt í :P 

Hérna er aðeins öðruvísi útgáfa, en petalarnir eru með sama sniði :) 

Takk fyrir mig, endilega skiljið eftir línu ef þið kíkið við :) Sérstaklega ef þið hafið ábendingar, það kæmi mér stórlega á óvart ef þetta uppskriftaróbermi er gallalaust :P

Kveðja,
Jódís Eva

Einföld myndvinnsla í Photoshop

Úr föndri yfir í myndvinnslu :)
Photoshop er merkilegt fyrirbæri.
Í þessari færslu ætla ég að fara yfir basic grunninn þegar kemur að því að poppa myndir aðeins upp, semsagt hvernig á að jafna út lýsinguna og fikta aðeins með burn-fítusinn. Það eru að sjálfsögðu til myndbönd á youtube sem sýna þetta allt, sem og alls konar blogg (flest öll reyndar á ensku), en mér finnst eins og oft gleymi fólk að gera ráð fyrir algjörum byrjendum og gefi ekki nægar upplýsingar um hvar hitt og þetta er að finna í forritinu, og þau mistök ætla ég ekki að gera... og því verður þetta kannski soldið langdregið hjá mér :P En ég tel að það sé betra að svokölluð tutorial sé með of mikið af upplýsingum en of lítið :)
Auðvitað er kostur að vera með smá grunn, hafa allavega opnað photohop einu sinni eða tvisvar, en ég ætla að gera mitt allra allra besta til að þessi færsla geti verið notuð til að koma fólki af stað :) Ég kann voða lítið á tæknilegu hliðina á photoshop, öll mín kunnátta er komin af áralöngu fikti og því verður kennslan mjög óformleg ;) Einnig hef ég ekki prufað apple-græju í 10 ár þannig að það þýðir því miður ekki að spurja mig ráða varðandi hvernig á að nota photoshop þar, en ég hugsa að margt af þessu virki líka í macca :)

Smá upplýsingar áður en ég byrja. Þegar þarf að opna glugga eins og t.d. levels, mun ég setja í sviga hvar það er að finna svona: (Image - Adjustments - Levels): eins og sjá má á eftirfarandi mynd.

 Einnig er mjög mikilvægt að vera með History opið þannig að hægt sé að fara til baka ef mistök eru gerð. Ef History opnast ekki sjálfkrafa þegar þú startar photoshop, er það að finna undir Windows-tabbinu efst (sjá mynd)

Ok þá byrja ég :) Myndin sem ég ákvað að nota er af krökkunum mínum, Atlasi og Rebekku, tekin haustið 2013 í listigarðinum hérna á Akureyri. Hún hentar einmitt vel til sýnikennslu því hún er frekar dökk, andlitin soldið í skugga, og litirnir fyrir aftan þau virka mjög daufir af fyrra bragði en eiga sko aldeilis eftir að poppa þegar ég er búin að gramsa í þeim ;)

Svona leit myndin út nýkomin úr vélinni. Það fyrsta sem ég ætla að gera við hana er að jafna lýsinguna og til þess nota ég Levels (Image - Adjustments - Levels) -sjá fyrstu myndina)

Þá poppar semsagt þessi margumræddi Levels-gluggi upp.
Þegar ég vinn andlitsmyndir byrja ég alltaf á því að gera myndina eins bjarta og hún getur verið án þess að hún brenni útí hvítt og það er einföld leið til að passa uppá það.

Það fyrsta sem maður gerir er að halda inni Alt-takkanum á lyklaborðinu og klikka svo á HVÍTA sliderinn. Þá verður myndin alveg svört. Prufið svo að renna slidernum varlega til vinstri þangað til byrja að myndast rauðir blettir á andlitunum. Á myndinni hérna að ofan hef ég tekið sliderinn of langt og rauðu blettirnir gefa í skyn að þarna sé andlitið brunnið, eins og sagt er, og það er ekki gott. Þá tek ég sliderinn aðeins aftur til hægri þangað til andlitið verður aftur svart, stoppa bara rétt áður en það fer útí rautt :)

Ermarnar hennar Rebekku verða reyndar aðeins of hvítar og seinna mun ég kannki koma með tútoríal um hvernig á að vinna parta af myndinni í sitthvoru lagi - en það er ekki komið að því ennþá. ANYWAYS.... passa að engir rauðir blettir séu á andlitum og þá er þetta circa svona:

(PS - þessar myndir eru soldið groddaralegar því ég gat ekki gert "print screen" á meðan ég hélt inni ALT-takkanum og varð því bara að taka venjulega ljósmynd af skjánum hehe... maður reddar sér ;) )

Nú má sleppa ALT-takkanum og þá verður myndin aftur eins og hún á að vera, nema auðvitað aðeins bjartari. Til að auka contrastinn er síðan ráðlegt að draga svörtu örina aðeins til hægri, og svo gráu örina aðeins til vinstri svo svörtu svæðin hverfi ekki alveg.

Það að gera Levels "rétt" tekur smá æfingu og í raun er ekkert eitt rétt... en það að gera andlitin eins björt og þau geta verið, hjálpar rosalega uppá lúkkið, sérstaklega fyrir prentun :)

Næsta skref er Curves (Image - Adjustments - Curves)

Curves er notað til að setja enn meira contrast í myndina og langoftast þegar ég nota það, set ég smá svona lauslega S-kúrvu á línuna. Oft er S-ið meira áberandi en á þessari tilteknu mynd, en ég vildi ekki hafa hana of ýkta. Eins og með Levels, er Curves eitthvað sem þarf að fikta voða mikið í til að fá tilfinninguna :)

En nú byrjar aðal-föndrið: Burn :)

Burn-takkann er að finna í svokölluðu "tools" bar vinstra megin á skjánum (eða þar er það allavega í minni tölvu, það er hægt að færa það hvert sem er). Það er lítil ör á takkanum sem opnar drop-down menu og þar er hægt að velja bæði dodge og burn, og á þessari mynd notaði ég bara burn þó að ég noti að öllu jöfnu bæði. Anyways...

Þessi græja er notuð til að setja meiri lit/contast/úmpf í hluta af myndinni; í þessu tilfelli, bakgrunninn.

 Til að byrja með þarf að stilla bursta-stærðina. Hjá mér er hann stilltur í 257 px og er þá á stærð við ca. helminginn af andlitinu - en myndin sem ég er að vinna er bara í netupplausn fyrir bloggið. Ef þú ert að vinna mynd í prentupplausn er líklegra að burstinn þurfi að vera einhversstaðar á bilinu 1000-1500 px, maður finnur bara hvað hentar best :)

Einnig er mikilvægt að hafa "hardness" sliderinn í 0 því annars koma harðar útlínur þegar þú byrjar að mála.

Svo þarf að stilla Exposure. Því hærri sem talan er, því ýktari verða áhrifin af burstanum. Oftast hef ég þetta bara stillt á ca. 25% en það getur verið gaman að prufa að hækka töluna og sjá hvað gerist :) Einnig er hægt að breyta "range" í bæði shadows (þá ýkjast litir á dekkri svæðum) og midtones (þá dekkjast ljósari svæði sem bregðast ekki við þegar stillt er á shadows)... Highlights er líka valmöguleiki, en hann mun ég ekki nota að sinni.

Semsagt! Þá er burn-burstinn tilbúinn og þá er að byrja að mála.

Hérna er ég búin að fara yfir trén fyrir aftan þau. Þetta er gert í nokkrum skrefum, semsagt ég sleppi músinni reglulega svo þetta verði sem jafnast...Takið eftir því hvað litirnir verða miklu sterkari. Ég fór líka aðeins yfir grasið en það sést nánast ekki neitt af því það er svo ljóst. En þá kemur Range-ið inn aftur. Í staðinn fyrir að vera með stillt á "shadows" breytir maður í "midtones" og prufar að lita yfir ljósari partana af myndinni, semsagt grasið (ég minnkaði burstann til að komast betur að) :

Og TA DA!! Allt í einu kominn smá gras-litur á grasið :P 

Og þá myndi ég segja að myndin sé að mestu tilbúin :) Það mætti kannski skerpa hana aðeins, en það er bölvað trix að ná því réttu þannig að ég ætla ekki að hafa það með í þetta sinn.

Í lokin ætla ég að setja inn smá yfirlit með öllum skrefunum sem ég fór yfir :)

Eitt sem verður að passa, og það er að fara ekki of geyst í t.d. burnið eða curves, nema það sé sérstaklega lúkkið sem maður vill. Að öllu jöfnu er minna meira, eins og sagt er :)

Takk fyrir lesturinn og ekki hika í hálfa sekúntu að spurja betur útí þetta ef eitthvað vefst fyrir ykkur, ég er alveg ný í að gera svona tutorial og allar ábendingar vel þegnar :)

Svo má endilega deila færslunni ef hún kom að notum :)

Kær kveðja, 

Jódís Eva

Postulíns-pennar :)

Jæja, þá er það fyrsta færslan. Þegar ég áttaði mig á því að handavinnublogg myndi sameina hérumbil öll áhugamálin mín (handavinnu, ljósmyndun, skriftir, og þá staðreynd að ég á oft soldið erfitt með að búa til sama hlutinn tvisvar) þá bara varð ég að prufa það :) Vonandi eru einhverjir sem hafa gaman að þessu hjá mér :)

Já semsagt, ég er alltaf að leita mér að einhverju nýju til að dunda við og það nýjasta þessa dagana er postulíns-skrap. Hljómar ekki voða næs, ég veit, en kemur alveg svakalega skemmtilega út:

Postulínið pikkaði ég upp á sikk hjá Hjálpræðishernum :)

  Pennana keypti ég í Föndru. Þeir voru ekki alveg það sem ég hefði í huga, einum of grófir og ekki "oil based" eins og Pinterest vildi meina að væri aðal-málið... en þar sem ekki var aðra penna að fá hérna á Akureyri, skellti ég mér bara á þá.

Ég fylgdi þessum leiðbeiningum nokkuð nákvæmlega en þrátt fyrir það, var enn hægt að kroppa litinn af með frekar lítillri fyrirhöfn :/ Ég útiloka ekki að ég hafi gert einhver mistök, kannski þurfa þeir að bíða eitthvað aðeins lengur... en næst held ég að ég verði mér útum  öðruvísi penna því þetta er allt of mikil vinna til að ég sætti mig við að þetta nuddist af við smá þvott!

Þá er það aðal - græjan! Það eru örugglega margir sem fá hroll bara við tilhugsunina um að skrapa postulín með teppahníf, ég meðtalin áður en ég prufaði... en maður áttar sig á því mjög fljótt hvernig maður á að stjórna hnífnum til að komast hjá því að tapa vitinu :P

Eins og sjá má er þetta stórhættulegt kvikindi, ég sargaði stóra rispu á þumalputtann strax á fyrsta degi :P Ég mæli með því að nota teppahníf frekar en annarskonar hníf af því það er mjög gott að geta brotið af blaðinu af og til því það missir skerpuna ansi fljótt :)

Anyways, þá er það diskurinn:

Það fyrsta sem ég gerði var að fylla inn i stóru svæðin. Þessi tiltekni diskur hentaði mjög vel af því hann er með skýr skil sem hægt er að nota sem viðmið fyrir munstrið. Það þyrfti að hafa aðeins meira fyrir þessu ef diskurinn væri bara flatur :) En flatir diskar henta þó betur ef á að gera stóra mynd (sjá myndir neðst í færslu).

Það tekur ca. 2-3 umferðir til að ekki sjáist penna-för (takið eftir pennaförunum á kúrvunum). Ég myndi segja að það væri sniðugt að bíða í ca. sólarhring á milli umferða af því fyrsta umferðin á það til að nuddast af ef hún er ekki orðin alveg þurr þegar maður byrjar að lita aftur - en ég beið bara í 4-5 tíma og litaði mjög laust og það gekk svona skítsæmilega :P Þriðja umferðin var svo bara til að fylla uppí smágöt. 

Hér eru svo kúrvurnar eins og þær komu út eftir fyrstu umferð. Ég fór aðeins ofan í þær aftur en þó má enn sjá smá penna-för í loka-niðurstöðunni og mér fannst það allt í lagi. 

Síðan byrjaði skrapið. Þetta er náttúrulega soldið tímafrekt, en samt sem áður rosalega róandi. Maður þarf ekki að hugsa neitt voða mikið, en samt er þetta ekki einhæft. 

Það er smá trix að halda rétt á hnífnum þannig að maður myrði ekki aðra fjölskyldumeðlimi með ískri, og ég var alltaf að snúa bæði disknum og pennanum, eftir því í hvaða átt ég var að skrapa. Það er best kannski að vera bara einn heima þegar maður prufar fyrst :P

Þegar ég var svo alveg búin að skrapa hringinn, skellti ég einu blómi í miðjuna :)

Hér er svo afraksturinn.

********************************************************************************

Þá eru það bollarnir. Þessir tilteknu bollar fannst mér mjög skemmtilegir því þeir eru örlítið kassalaga og því góður flötur til að vinna á :)

Svipað prósess og með diskana, nema í þetta skiptið passaði ég að hafa kúrvurnar aðeins þykkri og með stórri kúlu á endanum svo ég hefði meiri stjórn yfir þykktinni þegar ég byrja að skrapa. Svo reyndi ég að hafa blómin sem jöfnust og stundum þurfti ég að teikna þau aftur svo petalarnir litu rétt út þegar ég fór að setja útlínurnar (sjá næstu mynd.)

Hérna er ég búin að skrapa eitt blóm og er aðeins byrjuð á kúrvunum. Þarna má líka sjá smá leiðréttingu, ég skafaði óvart aðeins of langt upp og þurfti að fylla uppí með smá klessu. Ég geymdi þettta svona í nokkra tíma og fór svo aðeins yfir blettinn aftur til að fela pennaförin, og kláraði svo að skafa ca. 10 mínútum seinna :)

Hérna er svo fyrri bollinn tilbúinn. Sá sem er á myndinni á undan er seinni bollinn og á honum passaði ég mig aðeins betur á því að nudda ekki blómin hinum megin á meðan ég var að skafa, en á þessum fyrsta var ég ekki búin að átta mig á því hversu viðkvæm þau væru og þess vegna vantar soldið inní þessi blóm. Ég íhugaði að laga þau en lagði svo ekki í það og skóf frekar bara meira innan úr hinum svo þetta yrði nokkuð jafnt.

Ég passa mig betur næst :)

*********************************************************************************

En eins og ég sagði í byrjun, þá gekk þetta ekki nógu vel því pennarnir eru ekki alveg nógu traustir.  Enn er hægt að skrapa af þeim einum of auðveldlega og ég sé fyrir mér að ákafur köku-unnandi gæti óvart skafað hálft blómið af í óðagoti og ekki vil ég það! :P Held að ég prufi bara að skella þeim aðra ferð í ofninn :)

Í lokin eru myndir af stærri diskum sem ég gerði líka, einn með skrapi, og hinir tveir gerðir með því að fletja litinn út með puttanum þegar hann er enn blautur :) Diskana sjálfa hef ég átt í mörg ár en aldrei notað mikið því þeir eru svo óskaplega þungir að ég nenni ekki að vaska þá upp :P Held að þeir muni henta mjög vel sem kökuföt eða álíka, núna þegar þeir eru orðnir svona fínir :)

Þetta er fyrsta skrap-verkefnið. Þarna var ég ekki búin að uppgötva teppahnífinn og var að skakklappast áfram með einhverskonar prjón... sem eins og sjá má gefur ekkert svakalega fínlegar niðurstöður, en ég er sátt við diskinn fyrir því :)

Fingrafara-blóm :P Þetta lúkk er fengið með því að klessa litinn niður jafnóðum.

Nær-mynd. Það fyrsta sem mér datt í hug þegar ég sá þetta var einhver svakaleg glæpasaga þar sem listamaður fremur einhvern glæp og er síðan uppgötvaður af því hann hefur gert svona mynd og skilið eftir sig öll þessi fingraför :P .... smá off-topic :P

Og svo síðasti diskurinn. Sama fingra-klessu-aðferð og á blómadisknum notuð hérna :)

**********************************************************************************

Takk kærlega fyrir, þið sem nenntuð að skoða þetta. Komment og spurningar eru meira en velkomin :)

Kær kveðja, 

Jódís Eva