Uppskrift: Blómadúlla

Þessi dúlla er frekar lík þessu blómi en er þó ekki alveg og ég er orðin aðeins flinkari í að skrifa uppskriftir síðan þá :)

Ég kýs að öllu jöfnu að nota engar skammstafanir í uppskriftirnar mínar en ég ætla að útskýra hér þá einu sem ég nota: "2ll-gat" eða "3ll-gat" og þá á ég við gat sem myndast þegar heklaðar eru 2 eða 3 loftlykkjur í umferðinni á undan.
Uppskriftin er öll bundin í myndum í þetta sinn, er enn að þreifa mig áfram með hvernig er best að setja þetta fram, endilega segið mér hvað ykkur finnst og endilega skellið mynd á facebook vegginn minn ef þið gerið svona :)

Garnið heitir Steinbach Wolla og er bómullargarn sem er mjög svipað mandarin petit og heklunálin er nr 3.5

ATH: í lok hverrar umferðar er garnið fest við byrjun umferðar með keðjulykkju.

Njótið vel!

Uppskrift: Árniður - heklaðar ermar!

Nafnið Árniður fékk ég með því að biðja um aðstoð við nafngiftinna inná facebook síðunni Handóðir Heklarar og var það kona að nafni Jónína Kjartansdóttir sem stakk uppá því. Mér fannst það passa einstaklega vel því bakstykkið minnir mig soldið á öldutoppa :)

Þegar ég var að ákveða stærðina á þessum ermum var ég með 7 ára dóttur mína í huga, en þær eru hannaðar þannig að rosalega auðvelt er að þrengja eða víkka handveginn og lengja ermarnar eftir þörfum og óskum þegar fram líða stundir. Þannig að hvort sem á að hekla á 3ggja ára eða 10 ára, er byrjað eins :)

Þessar tilteknu ermar voru heklaðar með nál nr 3.5 úr þessu 100% bómullargarni á næstu mynd en fyrsta atrennan að ermunum var hekluð úr King Cole Glitz akrýl-garni úr rúmfatalagernum og stærðin varð nánast alveg sú sama. Til að minnka hana örlítið, myndi ég nota lanett eða kambgarn og nota nál nr. 2.5 :)

Aðferð:
Byrjað er í miðjunni á bakstykkinu og heklað fram og til baka langsum. Síðan er slitið frá og heklað frá miðjunni alveg eins í hina áttina til að mynda speglun. Handvegirnir eru síðan heklaðir saman og kantur heklaður í hring utanum búkinn og framan á ermarnar.

Vindum okkur í þetta :)

Bakstykki, fyrri partur:

1. umf: Helkið 123 loftlykkjur.

2. umf: í 3 lykkjuna frá nálinni heklið 1 fastapinna. Heklið fastapinna út umferð (122 fp)

3. umf: Heklið 2 loftlykkjur og heklið fastapinna í næstu lykkju. Heklið fastapinna út umferð (122 fp)

4. umf: Heklið 3 loftlykkjur og setjið stuðul í næstu lykkju. Heklið 1 loftlykkju og hoppið yfir næstu lykkju.
 *Heklið stuðul í næstu lykkju, heklið 1 loftlykkju, hoppið yfir næstu lykkju*
Endurtakið allt á milli * og * út umferð þangað til 3 lykkjur eru eftir, heklið þá eina loftlykkju, hoppið yfir næstu lykkju og setjið stuðul í síðustu tvær lykkjurnar. (60 1ll-göt)

5. umf: Þessi umferð er eins og 4. umferð: Heklið 3 loftlykkjur, heklið stuðul í aðra lykkjuna. Heklið síðan stuðla og loftlykkjur til skiptis þannig að stuðlarnir sitji ofaná stuðlunum úr 4. umferð. Endið á tveim stuðlum hlið við hlið.

6. umf: Heklið 2 loftlykkjur og heklið fastapinna í næstu lykkju. Í fyrsta 1ll-gatið, heklið 1 fastapinna. Í öll hin 1ll-götin nema það síðasta, heklið 2 fastapinna. Í síðasta fer 1 fastapinni. Heklið fastapinna í síðustu 2 lykkjurnar.

7. umf: endurtakið 3. umferð.

8. umf: Heklið 2 loftlykkju og heklið fastapinna í næstu lykkju.
*Heklið 4 loftlykkjur, hoppið yfir 3 lykkjur, heklið fastapinna í næstu lykkju*
Endurtakið allt á milli * og * út umferð = 30 stór göt.Endið á 1 fastapinna í síðustu lykkjuna.

9. umf: Heklið 2 loftlykkjur og heklið fastapinna í næstu lykkju. Inní fyrsta 4ll-gatið heklið þið 1 fastapinna.
 *inní næsta 4ll-gatið heklið þið 4 stuðla, 2 loftlykkjur og 4 stuðla. Heklið einn fastapinna í næsta 4ll-gat. Heklið 4 loftlykkjur. Stingið nálinni inní 3 loftlykkjuna, dragið bandið í gegn og einnig í gegnum lykkjuna nú þegar á nálinni (í raun bara keðjulykkja svo myndist lítill knúpppur). Heklið 3 loftlykkjur. Heklið einn fastapinna í næsta 4ll-gat.*
Endurtakið allt á milli * og * þangað til komið er að næst-síðansta 4ll-gatinu. Inní það fer 4st, 2 ll, 4st, og í síðasta gatið fer 1 fastapinni. Heklið tvo fastapinna í síðustu 2 lykkjurnar í umferðinni.

 10. umf: Heklið 3 loftlykkjur og heklið stuðul í næstu lykkju.
 *Heklið fimm loftlykkjur og heklið fastapinna í næsta 2ll-gat. Heklið 5 loftlykkjur og heklið keðjulykkju í gegnum næsta keðjulykkjuknúpp*
Endurtakið allt á milli * og * út umferð. Endið á fastapinna í síðasta 2ll-gatið, heklið 5 loftlykkjur og heklið stuðul í síðustu 2 lykkjurnar.

11. umf: Heklið 2 loftlykkjur og heklið 1 fastapinna í næstu lykkju. *Inní næsta 5ll-gat heklið 5 fastapinna. Heklið fastapinna í næstu lykkju. Inní næsta 5ll gat heklið 5 fastapinna. Heklið svo fastapinna á sama stað og keðjulykkjan fór í 10. umferð: í gegnum keðjulykkjuknúppinn úr 9. umferð* Endurtakið allt á milli * og * út umferð. Endið á fastapinna í síðustu 2 lykkjurnar.

 12 - 22. umf: Endurtakið 3. umferð.
Slítið frá.
*ATH!* Ef þið viljið hafa  ermarnar þrengri, er hægt að hafa færri fastapinnaumferðir hérna. Af því ermarnar eru speglaðar, er hægt að rekja upp báðum megin áður en handvegurinn er heklaður saman sem er mjög hentugt :)

Bakstykki, seinni partur:

Snúið verkinu eins og næsta mynd sýnir:

**Passið mjög vel að verkið snúi rétt, semsagt að 9. umferð snúi pottþétt upp því ef þið byrjið óvart vitlausu megin, speglast ermarnar ekki rétt (ég gerði þau mistök í fyrstu atrennu á uppskriftinni, þá byrjaði ég hinum megin og þurfti að slíta frá og færa mig yfir þegar kom í ljós að 9. umferð hérna megin passaði ekki við hinum megin :P Þetta er ekki neitt sem fólk tekur eftir... en samt :)

1. umferðin af seinni partinum er miðjan á verkinu og er eins og 4. umferðin af fyrri partinum. Heklað er í baklykkjurnar á uppfitinu eins og sést á myndinni fyrir neðan.

2. umferðin er eins og 6. umferð af fyrri partinum en er í raun 1. umferð ef maður er að spá í spegluninni. Þetta er örlítið ruglingslegt af fyrrabragði, en næsta mynd útskýrir það vonandi betur :)
3. umferðin er eins og 2. umferðin af fyrri partinum og svo er bara haldið áfram með 3-22 umferð af fyrri parti. 

Á þessum tímapunkti er komin stórfínn löber eða jafnvel taska ef þetta er brotið saman og saumað fóður inní :P En ég ætla að gera þetta að ermum og held því áfram á þeirri leið. Hinsvegar get ég ekki verið jafn nákvæm frá þessum tímapunkti því kantarnir geta verið soldið misjafnir eftir því hvernig maður gerir næsta skref.

Handvegur:

Nú þarf að hekla eða sauma saman þá parta af stykkinu sem verða handvegirnir. Ég heklaði saman 20 lykkjur hvoru megin, en hversu mikið er heklað saman fer eftir stærð barnsins. 20 lykkjur er passlegt fyrir dóttur mína sem er mjög grönn og 7 ára, en svo passaði það líka ágætilega á son minn sem er þéttur bolti en bara þriggja og hálfs. Þannig að ég myndi ráðleggja ykkur að fá að máta ermarnar á barnið sem á að fá þær :) Munið samt að verkið á eftir að tegjast soldið þegar skolað er úr því, sérstaklega útaf öllum stóru götunum.

Búk-kantur:

Nú er komið að því að hekla búk-kantinn (ég kalla þetta búk-kant því ég hef ekki betra orð, þetta er semsagt kanturinn sem liggur meðfram handvegunum, yfir axlirnar og yfir bakið).

1. umf: Inní annað hvort handakrikahornið, heklið 3 loftlykkjur, heklið stuðul í sömu lykkju, heklið 2 loftlykkjur og 2 stuðla, allt í sömu lykkju. *Hoppið yfir 4 lykkjur. Í næstu lykkju heklið 2 stuðla, tvær loftlykkjur og 2 stuðla*. Endurtakið allt á milli * og * út umferð. Ég var með 33 stykki af 2st-2ll-2st laufum á mínum ermum, en þessi tala getur verið misjöfn eftir því hversu mikið var heklað saman af handveginum. Festið með keðjulykkju efst í 3ll í byrjun umferðar.
      *ATH* Ef það passar ekki fullkomlega að hafa 4 lykkjur á milli allra laufana er bara að hagræða þessu örlítið eftir þörfum, endinn á umferðinni lendir undir handleggnum og því mjög erfitt að sjá ef t.d. 2 síðustu laufin eru bara með 3 lykkjur á milli sín.

2. umf: heklið keðjulykkju inní fyrsta 2ll-gatið. Heklið 3 loftlykkjur. Heklið 2 stuðla, 2 loftlykkjur, og 3 stuðla. *Í næsta 2ll-gat, heklið 3 stuðla, 2 loftlykkjur og 3 stuðla.* Endurtakið allt á milli * og * út umferð og festið með keðjulykkju við byrjun umferðar.
Slítið frá.

Erma-kantur

1. umf: Hér þarf fyrst að hekla fastapinnakant til að jafna ermarnar út. Hjá mér urðu það 51 fastapinni en þessi tala getur rokkað örlítið án þess að sjáist neinn munur. Þetta er ca. 1 fastapinni fyrir hverja fastapinnaumferð á bakstykkinu og tveir fyrir hverja stuðlaumferð. Festið með keðjulykkju við byrjun umferðar.

2. umf: Þessi umferð er eins og 1. umferð af búk-kantinum. Ég var með 11 stykki af 2st-2ll-2st laufum hérna, en eins og á búk-kantinum, er þessi tala ekki heilög.
3. umf: Heklið keðjulykkju inní næsta 2ll-gat. Heklið 3 loftlykkjur, 1 stuðul, 2 loftlykkjur, og 2 stuðla í sama gat. *Í næsta 2ll-gat heklið 2 stuðla, 2 loftlykkjur, 2 stuðla.* Endurtakið allt á milli * og * út umferð og festið með keðjulykkju við byrjun umferðar.
4. umf: Hekluð eins og 2. umferð af búk-kantinum.
5. umf: Endurtakið umferðina á undan. 

Heklið eins á hina ermina.
Slítið frá og gangið frá endum.

Það er soldið bras að skola úr þessum ermum og móta þær svo þær verði fallegar, en ég myndi mæla með að láta þær þorna á svona uppblásnu herðatré eins og t.d. þessu 

Já, þar hafiði það :) Ég er búin að lesa ca. milljón sinnum yfir uppskriftina og er búin að grípa nokkrar villur og laga en þetta er allt farið að dansa fyrir augunum á mér á þessum tímapunkti og ég bara verð að pósta þessu áður en ég verð rugluð hehe :P Ef þið rekið augun í eitthvað misræmi eða eitthvað sem er illskiljanlegt, þá bið ég ykkur innilega um að láta mig vita svo uppskriftin geti verið sem nákvæmust, ég vil að ALLIR skilji hana, ekki bara lengra komnir :) Og auðvitað ef gengur vel væri gaman að heyra það líka, ég er enn að æfa mig í uppskriftarskriftum :)

Einnig ef þið heklið svona ermar, þætti mér alveg gjörsamlega yndislegt ef þið mynduð linka á uppskriftina mína eða facebook vegginn minn ef þið póstið mynd af þeim einhversstaðar (og megið jafnvel skella myndinni á facebook-vegginn hjá Snedderíi :)

Með bestu kveðju,
Jódís Eva 

Lærðu að læra á gítar!

*DISCLAIMER*: Ef einhver sem kann í alvöru á gítar sér þessa færslu og hneikslast yfir vinnubrögðunum vil ég bara taka það fram strax að ég kann eiginlega ekki rass í bala á gítar. Ég er soldið mikill söngfugl og aðal drifkrafturinn þegar ég var að læra á gítar 14 ára var að geta glamrað með gólinu og því er allt sem ég spila í sínu einfaldasta formi. Það var bara svona sem ég lærði og mér datt í hug að það gæti nýst einhverjum :)

Já ég semsagt ákvað að taka mér smá pásu frá heklinu og skrifa eina litla færslu um allt annað: Gítargrip! Það er ekki beinlínis handavinna en það er svo sannarlega snedderí! (PS - ég komst að því eftir að ég ákvað nafn á bloggið mitt að snedderí er ekki orð eins og ég hélt *andvarp*... en ég er hér til að segja ykkur að það er bara VÍST orð! Það er nafnorðsútgáfan af lýsingarorðinu sneddí og gæti mögulega verið besta orð í heimi! Just sayin ;) 

Anyways...

Ég hef oft heyrt fólk segja að það vildi óska þess að það gæti spilað á gítar en lætur svo ekki verða af því, það sér fyrir sér dýra einkakennara og marga klukkutíma við að mastera nótur og eitthvað svoleiðis húllumhæ...
En málið er að það þarf ekki að vera svona flókið. Gítar er ekki eins og píanó eða fiðla og ef þig langar bara að læra nóg til að geta spilað undir hópsöng á ættarmóti, þá er ég með lausn fyrir þig...

Skjáskot tekið af www.guitarparty.com :)

Þegar leitað er að gítargripum á www.guitarparty.com er alltaf svona blár kassi hægra megin sem heitir "Hljómar í laginu" (Hljómar og grip eru það sama). Sömuleiðis eru nánast alltaf svona myndir í gripabókum (þannig lærði ég í "gamla daga") Og þessir litlu rúðustrikuðu kassar eru í raun litlir gítarhálsar og þessar doppur eru í raun litlir puttar :D

Lemmér að útskýra betur með mynd:

Að sjá fyrir sér gítarhálsinn

 

Það sem ruglaði mig alltaf fyrst þegar ég var að læra var það að mér fannst skýringarmyndirnar alltaf snúa vitlaust miðað við hvernig ég hélt á gítarnum og því ímynda ég mér að það gæti hjálpað sumum að sjá þetta svona á hlið. Eins og þið sjáið, er ég með puttana á sama stað og doppurnar á myndinni. Skýringamyndirnar sem fylgja með lögunum eru náttúrulega minni en skýringamyndin mín og ekki með strengina merkta, en um leið og maður sér fyrir sér gítarhálsinn, þá smellur eitthvað í hausnum og maður getur tengt doppurnar við puttana og allt í einu getur maður spilað á gítar! (Doppurnar og X-in sem eru fyrir ofan gripið er eitthvað sem ég pæli aldrei í, hefur að gera með hvaða strengi á að slá í hvert sinn, en ég slæ þá bara alla sama hvað hehe)

Það er sama málið með öll hin gripin, ef maður skilur doppurnar, getur maður spilað gripið. Það er miserfitt að halda strengjunum niðri eftir gripum og það getur verið fjári erfitt að vinna upp sigg á fingurgómunum (mæli með nælonstrengjum til að byrja með, þeir meiða ekki eins mikið og hljómurinn er svo fallegur, finnst mér ) og það þarf að læra að halda taktinum þegar strengirnir eru slegnir... en þegar þessi skilningur á gripunum er kominn, liggur ekki svo mikið á hinu, það kemur með tímanum.

 Vöðvaminnið mikilvægast 

 

Að muna öll gripin er náttúrulega trix útaf fyrir sig og sérstaklega að læra hvernig á að skipta á milli gripa. En það er bara eitthvað sem kemur með æfingunni, það þarf að þjálfa vöðvaminnið ... ég get t.d. vélritað alveg svakalega hratt, en heilinn á mér man engan vegin í hvaða röð stafirnir eru á lyklaborðinu, bara puttarnir. Það er eins með gítarinn, ef einhver spyr mig að fyrra bragði hvar vísifingurinn á að vera í C-gripi, þarf ég að gera gripið í loftinu til að geta sagt það (sér einhver annar fyrir sér Phoebe í Friends að gera Bearclaw og The Old Lady þegar ég segi þetta?? ;) )

Hérna er mynd af D-gripi og það er sama sagan þar :) By the way, EKKI reyna að spila með svona langar neglur, það er vita vonlaust, ég bara gleymdi að fara í klippingu fyrir myndatökuna, hef ekki spilað soldið lengi ;)

Að spila eftir gripa "uppskrift"

 

Þegar þú ert farin/n að geta gert 2-3 grip, þá er að finna eitthvað lag til að spila til að æfa sig að skipta á milli gripa :) Ég byrjaði sjálf á Litlu Andarungunum og gripunum A, E og D en það má byrja á nánast hverju sem er, á meðan það eru ekki of mörg grip í laginu.

Svo er spurning um að einfalda gripin. Flestir gítarkennarar myndu líklega fara að hágráta ef þeir sæu mig spila þar sem að ég geri t.d. mjög oft bara venjulegt C-grip þegar leiðbeiningarnar segja mér að gera Csus7 eða Cadd9 sem er svona fancy-smancy C-grip... en lífið mitt er bara nógu flókið án þess að vera að flækja það meira og C-grip dugar mér alveg til að geta sungið með því (og það dugar svo sannarlega sem undirspil fyrir blindfulla ömmu þína og frændur við varðeldinn í sumar ;) ) Hinsvegar mæli ég alveg með því seinna meir að læra þessi flóknari grip, Cadd9 er til dæmis óskaplega fallegt, hljómar mun draumkenndara en venjulegt C :) 

En já, skoðiði lagið sem ég setti inn þarna áðan, það er frekar straight forward: þegar stafurinn fyrir ofan orðin breytist, breytiru um grip. Ekki þarf að slá neinn flókinn takt til að byrja með, bara renna puttunum/nöglinni niður strengina með reglulegu millibili.

Ég vona innilega að þetta hafi hjálpað einhverjum, endilega leyfið mér að heyra hvað ykkur finnst :)

Uppskrift: Skellibjöllukjóll á Barbie

Í tilefni þess að ég er búin að opna facebook síðu fyrir Snedderí (www.facebook.com/snedderi )  ætla ég að bjóða uppá fyrstu NÁKVÆMU hekl-uppskriftina :P Vandaði mig sérstaklega í þetta skiptið, tók milljón myndir og heklaði kjólinn tvisvar til að sannreyna uppskriftina :)  Njótið vel :)

Kjóllinn er heklaður úr Mandarin Petit (veit því miður ekki númerið á honum, en þetta er skærasti græni liturinn) með heklunál nr. 2 og hann er því mjög þéttur og stífur. Ef á að hekla á mjaðmabreiðari barbie-dúkkur (eins og Fashionistas) væri sniðugra að nota nál nr. 3 eða 3.5 :) Myndi mæla með því að fólk sé með barbie-dúkku við höndina til að vera viss um að kjóllinn passi.

Byrjað er neðst á kjólnum og hann heklaður upp í einu stykki. Engar festingar eru á honum, dúkkunni er bara smeigt í hann. Perlurnar í honum eru Hama perlur, svona eins og maður straujar, en hægt er að nota hvaða perlur sem er, svo lengi sem bandið og heklunálin kemst í gegnum gatið :)

1. umf:
 Heklið 56 loftlykkjur og tengið saman í hring með keðjulykkju.

2. umf: 
Heklið 3 loftlykkjur, heklið stuðul í næstu loftlykkju. *heklið 2 loftlykkjur, hoppið yfir næstu 2 loftlykkjur, heklið 1 stuðul í næstu 2 loftlykkjur" endurtakið allt á milli * og * út umferð og festið síðan með keðjulykkju efst í loftlykkjurnar þrjár í byrjun umferðar (14 stuðlastoðir)

3. umf:
(þessi lýsing gerir ekki ráð fyrir perlum, enda eru þær smekksatriði. Skoðið myndirnar hér að neðan til að sjá hvernig á að setja perlurnar)
Heklið 3 loftlykkjur (jafngildir stuðli), heklið síðan 4 stuðla utanum og niður með fyrri stuðlinum í fyrstu stuðlastoðinni úr umferðinni á undan. Heklið eina loftlykkju. Heklið svo 5 stuðla utanum og upp með seinni stuðlinum: fyrsta laufið komið. Hoppið síðan yfir næstu stuðlastoð, og í þá þarnæstu gerið þið eins: 5 lykkjur niður fyrri stuðulinn, ein loftlykkja á milli og svo 5 stuðlar aftur upp seinni stuðulinn. Ath. að gott er að snúa verkinu á hlið eftir því í hvora áttina er heklað. Endurtakið lauf út umferð svo það séu 7 lauf. Festið með keðjulykkju efst í loftlykkjurar þrjár í byrjun en stingið nálinni einnig niður á milli stuðlanna tveggja úr umferðinni á undan, áður en bandið er sótt.

Ath: Perlurnar enda á því að liggja soldið skakkar, en persónulega finnst mér það flott. Mögulega væri þó fallegt að gera eina loftlykkju áður en perlan er sett uppá nálina, en það er smekksatriði :)

4. umf:
Heklið 3 loftlykkjur (jafngildir stuðli) og heklið einn stuðul á sama stað (í miðjunni á fyrsta laufinu). *Heklið 2 loftlykkjur, heklið tvo stuðla í miðjuna á laufinu, heklið 2 loftlykkjur, heklið tvo stuðla í bilið á milli laufanna*. Endurtakið á milli * og * út umferð, festið á sama hátt og áður með keðjulykkju.

5. umf:
Endurtakið 3. umferð.

6. umf:
Endurtakið 4. umferð, en í staðinn fyrir 2 loftlykkjur á milli stuðlastoða, er einungis gerð ein.

7. umf:
Endurtakið 3. umferð en í staðinn fyrir 5 stuðla hvoru meginn, eru einungis 4.

8-9. umf:
Endurtakið 6-7 umferð.

10. umf:
Endurtakið umferð 6, en í staðinn fyrir 1 loftlykkju, er engin.
*Ath. þetta er í raun stuðlastoðaumferð, en ég setti engin krókódílalauf í hana því ég ætlaði að setja lítinn borða eins og belti inná milli gatana. Hinsvegar má vel setja 4-stuðla lauf utanum þessar stuðlastoðir til að losna við götin og halda svo bara áfram með elleftu umferð sem tólftu :)

11. umf:
Heklið eina loftlykkju, *heklið fastapinna á milli stuðlanna tveggja. Heklið fastapinna í bilið á milli stuðlastoða* Endurtakið út umferð (28 fastapinnar).

12. - 34. umf:

Heklið fastapinna í hring upp búkinn ca. 22 umferðir. Þegar ég gerði kjólinn í fyrsta skiptið, miðaði ég lengd bolsins við lengdina á dúkkunni, eða semsagt hvar kjóllinn sæti best á mjöðmunum þannig að fastapinnaumferðirnar næðu akkúrat uppundir brjóstin (sjá mynd fyrir neðan) Síddin á kjólnum er að sjálfsögðu smekksatriði :)

ATH: til að kjóllinn sé fallegri að aftan, er betra að hekla fastapinnana í beinann hring, semsagt vera ekki að festa með kekkju á milli umferða

Þá er að móta kjólinn utanum brjóstin. Þessi partur er ekki brotinn upp skikkanlega eftir umferðum, enda er hann heklaður samfellt eins og búkurinn.

Staðsetning brjóstanna á kjólnum er svosem ekkert svakalega mikilvæg þar sem kjóllinn er nánast alveg eins að framan og aftan, en ég valdi bara lykkju sem er ca. fyrir ofan byrjun fyrstu umferðarinnar og setti ömmuspennu í hana (af því ég á ekki prjónamerki)  og sú lykkja telst vera sú síðasta í umferðinni.

Að merktu lykkjunni ómeðtalinni, heklið 11 fastapinna í næstu 11 göt. Í tólfta gatið heklið 6 fastapinna, síðan einn fastapinna í næstu fjögur göt (hér þarf að passa að hoppa ekki óvart yfir það fyrsta því þetta verður allt mjög þétt og stíft) heklið síðan aftur 6 fastapinna í næsta gat. Heklið fastapinna út umferð.

Heklið 3 umferðir af fastapinnum.

Nú þarf að færa prjónamerkið upp "beint á ská" eins og sjá má á næstu mynd (ath. að þegar ég tók myndina var ég komin aðeins lengra, en þið sjáið allavega hvað ég á við með "beint á ská" :P )

Að merktu lykkjunni ómeðtalinni, heklið 18 fastapinna. Heklið næstu 2 lykkjur saman og svo næstu tvær lykkjur eftir það saman (þetta eru lykkjurnar fjórar á milli brjóstanna). Heklið fastapinna út umferð.

Heklið eina umferð.

Í næstu umferð er handvegurinn mótaður:
Færið prjónamerkið upp aftur.
Að merktu lykkjunni ómeðtalinni, heklið 6 fastapinna. Heklið 12 loftlykkjur. Hoppið yfir fimm göt. Heklið 6 fastapinna. Heklið næstu tvær lykkjur saman og svo næstu tvær lykkjur eftir það saman. Heklið 6 fastapinna. Heklið 12 loftlykkjur. Hoppið yfir fimm göt. Heklið 10 fastapinna.

Inní handveginn: 2x fastapinni, 2x hálfur stuðull, 2x stuðull, 1x tvöfaldur stuðull, 2x stuðull, 2x hálfur stuðull, 2x fastapinni.
Heklið einn fastapinna, setjið síðan keðjulykkjur í næstu 11 göt og 1 fastapinna í næsta gat.
Heklið inní seinni handveg eins og þann fyrsta.
Heklið keðjulykkjur í næstu 4 göt.

Slítið frá og gangið frá endum.

Og þar hafiði það :) 

Ekki hika við að senda mér línu ef þið hafið einhverjar spurningar eða ef þið takið eftir villu, ég er enn að æfa mig í uppskriftarskrifum :)



Einnig, ef þið heklið kjólinn, þætti mér svakalega skemmtilegt ef þið mynduð pósta mynd af honum á facebook-vegginn hjá mér :D

Kv. Jódís Eva

Sjö ára vinátta í myndum :)

Patrek og Rebekka í mars, 2014

Hún Rebekka mín hefur ekki átt marga vini utan leikskólatímans, við fjölskyldan erum soldið einangruð og hittum að öllu jöfnu frekar fáa, fyrir utan að við bjuggum ekki í sama hverfi og leikskólinn hennar var í... en sem betur fer á hún frænda sem hefur henni verið soldið eins og bróðir allt hennar líf.

Ég er búin að vera að flokka myndirnar mínar soldið núna undanfarið og tók eftir því hversu rosalega margar sætar myndir ég á af þeim saman og mig langar til að raða þeim öllum upp í sögu, held að það verði mjög gaman að eiga í framtíðinni, bæði fyrir þau og mig :)

Maí, 2007

Þetta tel ég vera fyrstu myndina af þeim saman, þarna er Rebekka 3ggja mánaða og Patrek er þarna undir henni í bumbunni :)

Júní, 2007

Fyrsta ALVÖRU myndin af þeim saman, tekin uppá spítala stuttu eftir að Patrek fæðist :) Rebekka minnir mig alltaf einhvernvegin á nýklaktann fuglsunga á þessari mynd, soldið eins og hún sé að segja "Hey, sko hvað ég fann!"

Júní 2007

Hér er Patrek tiltölulega nýfæddur, búin að hlekkja sig utanum lífsreynda, fjögurra mánaða frænku sína í von um stuðning í þessum erfiða heimi.

Október 2007

Smá stökk í tíma, hér eru þau aðeins farin að stálpast :)

Febrúar 2008

Fyrsta kossamyndin af mörgum, þau eru nú hætt þessu í dag en fyrstu árin voru þau alltaf eitthvað að kyssast og knúsast :)

Sumar 2008

Patrek hjálpar Rebekku að renna upp í Kjarnaskógi :)

Nóvember 2008

Tilraun í jólamyndatöku, Rebekka eitthvað aðeins of knúsug fyrir Patrek :P

Desember 2008

Þessi mynd var nú þegar komin í þessa færslu en þar sem hún er í algjöru uppáhaldi, verður hún með hérna líka :) Þarna eru þau nýkomin af dagmömmujólaballi :)

Sumar 2009

 Passað uppá hvort annað í Kjarnaskógarferð.

Sumar 2009

Rebekka að brynna Patrek...

Sumar 2009

Svo sæt :)

Sumar 2009

Þetta er alveg leiðinlegasta þríhjól allra tíma, alveg vonlaust á komast eitthvað áfram á því án þess að sprengja sig af áreynslu... en þau kunnu lag á því :)

Október 2009

Smá nestisferð á Svalbarðseyri haustið 2009 :)

Febrúar, 2010

Á Glerártorgi á öskudaginn.

Desember 2010

Við jólatréð á aðfangadagskvöld :)

Nóvember 2011

Þarna eru þau orðin fjögurra ára og það er orðið töluvert erfiðara að ná mynd af þeim saman, man að ég gekk heillengi á eftir þeim þarna til að fá þau til að setjast uppí glugga og leyfa mér að smella einni :P

Nóvember 2012

Fimm ára og alltaf jafn góðir vinir :)

Desember 2012

Þarna eru þau að læra að dansa á meðan beðið er eftir matnum á aðfangadag, 2012 :)

Nóvember 2013

Ein úr jólamyndatökunni 2013, plús Atlas minn.

Mars 2014

Og svo allra nýjasta myndin, tekin núna á dögunum :)

Já, þar hafiði það :) Rosalega er ég ánægð með söguna mína, ef það er eitthvað sem ég elska, þá er það falleg ljósmyndasaga :) Vonandi get ég komið með framhaldssögu eftir nokkur ár :)